देव न्या रावन्या ✍️

 देव न्या रावन्या (देवाला विनंती अहिराणी )

जून चालना ना! कवय इश्यात!

सरना जाश्यात! पावसाया!!1

रोहिन्या त्या कोंल्ल्या! मिरीग बी कोल्ला!

कर ना तु वंल्ला! सर्वांसले!!2

तयार वावर! वखरी नागरी!

येऊ दे ना सरी! पानी न्याचं !!3

वाट देखी देखी! थके हाऊ जीव!

येऊ देना कीव! आते तरी!!4

कर्ज काढी काढी! करतंस शेती!

जपतस नाती! तरी आम्ही!!5

करतंस नहीं! व्यापारी सारखं!

देवले पारखं! लुटिसन!!6 

नई शेत आम्ही ! निरव ललित!

करतंस वलीत! शेती माती!!7

शेत स्वाभिमानी! दानी खानदानी!

शेतकरी मानी! अन्नदाता!!8

गयऱ्या रावन्या! करी रायनुत!

शेतस हो दूत! देव तुना!!9

जीव वाचाडानं! काम तुन करी!

पोट सर्व भरी !शेतकरी !!10©️®️

प्रदीप पाटील 

गणपूर ता. चोपडा 

जिल्हा. जळगाव 

मो. 9922239055